育兒問題Q&A：1-2歲——點訓練BB嘅自理能力呢？

唔知道大家仲記唔記得呢位學識自己去廁所嘅小朋友呢？佢非常proud of自己去廁所，以後唔洗再用片啦！

望住BB一步步成長，爸爸媽媽都會好感動。

但係訓練BB自己去厠所都係唔少爸爸媽媽嘅難題：BB幾時先可以甩尿片，開始用學習褲，甚至學識自己去厠所呢？

合適嘅時機

BB控制大小便嘅神經系統同肌肉，要係18個月左右先發展成熟。而過早開始要求BB自己去厠所，BB可能會因爲無法達到要求而感到挫敗，亦會令親子關係緊張。

一般而言BB歲半至兩歲開始訓練佢自己去厠所比較合適，當然，每個BB發展唔同，早少少遲少少都係正常嘅。

爸爸媽媽可以係呢個階段為BB做D咩呢？

• 俾BB每日吸取充分嘅水同纖維，確保排泄暢通
• 俾BB跟住爸爸媽媽去廁所，令佢有模仿機會
• 將便盆放係固定同BB熟悉嘅地方
• 可以俾BB著住尿片或者褲仔先練習坐係便盆上面，熟悉下感覺
• 同BB一齊睇同去廁所有關嘅繪本，開始向BB講解去廁所嘅步驟
• 改用學習褲，令BB開始感受到褲仔濕咗嘅感覺，BB識得分乾同濕非常重要！

係訓練BB自己去廁所嘅過程中，有咩需要注意呢？

• 選擇一個每日都會得閒嘅時間開始訓練BB去廁所，然後漸漸將把去廁所嘅時間同BB嘅日常生活配合，例如：安排係朝早起身或者瞓覺之前去廁所

• 爸爸媽媽觀察到小朋友想poo poo/ wee wee，可以主動問BB需唔需要去廁所，鼓勵BB坐上便盆

• 如果BB感到抗拒，唔好强迫佢，可以下次再嘗試

• BB每一次進步都係值得被誇贊嘅！

仲記得爸爸有一日買咗呢本書返黎，裡面有一個立體的廁所同拉紙巾，真係好搞笑！睇完書第二日蛋撻BB就主動講要wee wee坐小廁所，仲話姐姐有士多啤梨辮辮，慢慢就學識咗自己去廁所喇！